R. Walker & Sons
“Roedd y broses o wneud cais am arian yn hawdd iawn ac yn syml”
Awydd i ddatblygu sgiliau staff a hyrwyddo'r diwydiant adeiladu yn y gymuned oedd wrth wraidd cais cwmni R. Walker and Sons (Preston) Ltd am gymorth ariannol gan CITB.
Mae gan gwmni R. Walker, a sefydlwyd yn 1896, draddodiad balch o hyfforddi staff a phrentisiaid a gweithio gyda phartneriaid yn y gadwyn gyflenwi.
Fodd bynnag, er mwyn cynnal y traddodiad a pharhau i gyflawni ei ymrwymiadau o ran ei staff a hyfforddiant, bu'n rhaid i'r busnes, sydd hefyd yn gweithgynhyrchu ffenestri a drysau PVCu, ddatblygu agweddau penodol ar ei waith.
Er mwyn helpu i gyflawni'r nod hwn, gwnaeth y cwmni gais am £5,000 drwy Gronfa Hyblyg Sgiliau a Hyfforddiant CITB.
Bydd y cymorth ariannol, a ddechreuodd ym mis Gorffennaf 2016, yn helpu'r busnes i wneud y canlynol:
- Llunio ceisiadau gwell a chael gwaith.
- Gwella prosesau cyfathrebu mewnol ac allanol.
- Cyflawni prosiectau cynaliadwy drwy ddefnyddio proses rheoli carbon.
- Meithrin dealltwriaeth o Fodel Gwybodaeth Adeiladu (BIM) y diwydiant adeiladu.
“Roedd y broses o wneud cais am arian yn hawdd iawn,” meddai Julie Kinsey, Rheolwr Swyddfa R. Walker and Sons.
“Atebwyd fy ymholiadau yn brydlon gan ddefnyddio iaith syml, esboniwyd popeth yn fanwl. Roedd y staff cyllido o gymorth ac yn deall gofynion ein busnes.”
Mae R. Walker and Sons wedi bod yn cynnal cynllun hyfforddi prentisiaid sy'n cyflogi pobl ifanc ar gynlluniau hyfforddi ers y 50 mlynedd diwethaf. Nod ei waith yw sicrhau y caiff prentisiaid hyfforddiant manwl ac amrywiol yn y gweithlu ac yn y coleg.
“Bydd ein rhaglen a ariennir gan CITB yn helpu i ddarparu'r sgiliau a fydd yn ein galluogi i gynnal ein diwylliant o wella a chydweithio,” meddai Julie.